ടൂറിസ്റ്റ് പെർമിറ്റുകാർക്ക്‌ സ്റ്റെയ്ജ് കാരിയറായി ഓടിക്കാനാകില്ല. എഴുത്ത്.കെ.ജെ.ജേക്കബ്

ഹൈക്കോടതിയുടെ ഇടക്കാല ഉത്തരവും കേന്ദ്ര സർക്കാരിന്റെ വിഡിയോയും കണ്ടുകഴിഞ്ഞപ്പോൾ എല്ലാവര്ക്കും ഒരു കാര്യം മനസിലായിക്കാണണം: വിനോദ സഞ്ചാരമേഖല പ്രോത്സാഹിപ്പിക്കാനും ആ രംഗത്തുള്ള സംരംഭകർക്ക്‌ നേരിടേണ്ടിവരുന്ന ചില പ്രായോഗിക വിഷമതകൾ ഇല്ലാതാക്കാനും ചില സൗകര്യങ്ങൾ പുതുതായി ഏർപ്പെടുത്താനുമാണ് കേന്ദ്ര സർക്കാർ ബന്ധപ്പെട്ട ചട്ടങ്ങൾ ഈ വര്ഷം ഭേദഗതി ചെയ്തത്. (ലിങ്കുകൾ കമന്റിൽ കൊടുത്തിട്ടുണ്ട്) അതുവച്ച് ടൂറിസ്റ്റ് പെർമിറ്റുകാർക്ക്‌ സ്റ്റെയ്ജ് കാരിയറായി ഓടിക്കാനാകില്ല. 

***

നമ്മുടെ നിയമം അനുസരിച്ച് പൊതു ഗതാഗതത്തിനു രണ്ടുതരം വിഭാഗങ്ങളാണുള്ളത്: സ്റ്റെയ്ജ് കാരിയർ; കോണ്ട്രാക്റ്റ് കാരിയർ. രണ്ടിനും പ്രത്യേകം പ്രത്യേകം ചട്ടങ്ങളുമുണ്ട്. അതിൽ കോണ്ട്രാക്റ്റ് കാരിയറുകൾക്കു ടൂറിസം പെർമിറ്റ് കിട്ടും. ഒപ്പം കുറെ കർശന നിബന്ധനകളുമുണ്ട്. 

ഉദാഹരണത്തിന് അവർ നടത്തുന്നത് സർക്കുലർ സർവീസാണെകിൽ അത് നോട്ടിഫൈ ചെയ്ത  ടൂറിസ്റ്റ് കേന്ദ്രമായിരിക്കണം; പോകേണ്ട ഓരോ സംസ്‌ഥാനത്തുനിന്നും അപേക്ഷ കൊടുത്ത് ഫീസടച്ച് പെർമിറ്റ് വാങ്ങണം. തുടങ്ങിയടത്തുതന്നെ തിരിച്ചെത്തിയാൽ അക്കാര്യം  ബന്ധപ്പെട്ട അധികാരികളെ അറിയിക്കണം. യാത്രക്കാരുടെ ലിസ്റ്റിന്റെ മൂന്നു കോപ്പി കൈയിലുണ്ടാവണം; ബസ് സ്റ്റാൻഡുകളിൽ കയറാൻ പാടില്ല. 

പിന്നെയുമുണ്ട് കാക്കത്തൊള്ളായിരം നിബന്ധനകൾ.  

സത്യത്തിൽ ആ ചട്ടങ്ങളൊക്കെ വച്ച് ഇത്ര കാലം ടൂറിസം ഓപ്പറേഷൻ നടത്തിയ സംരംഭകരെ സമ്മതിക്കണം!

കേന്ദ്ര സർക്കാർ മിക്കവാറും ഇത്തരം നൂലാമാലകൾ ഒഴിവാക്കി,  അഖിലേന്ത്യാ ടൂറിസ്റ്റ് പെർമിറ്റ് എന്നൊരു പുതിയ പെർമിറ്റ് ഏർപ്പെടുത്തി. അതുവച്ചു ഇവിടെനിന്നു ആഗ്രയ്ക്കു പോകാൻ ഓരോ സംസ്‌ഥാനത്തുനിന്നും പെർമിറ്റും ലൈസന്സുമൊന്നും ഒന്നും വേണ്ട. പോയിട്ട് ഇങ്ങോട്ടുതന്നെ വരണമെന്നില്ല, അവിടെനിന്നു നിങ്ങള്ക്ക് വേറെ എങ്ങോട്ടെങ്കിലും പോകണമെങ്കിൽ പോയിട്ട് സൗകര്യം പോലെ വന്നാൽ മതി.   വരുന്ന കാര്യം അറിയിക്കണമെന്ന നിയമമൊക്കെ മാറ്റി.  

കൂടെ ചില്ലറ ആനുകൂല്യങ്ങള് കൂടുതലായി കൊടുത്തു. ഉദാഹരണത്തിന് ബസ് സ്റ്റാൻഡിൽ കയറാൻ പാടില്ല എന്ന ചട്ടം മാറ്റി. 

ഒരു ടൂറിസ്റ്റ് ബസിനു അതെങ്ങിനെ ഗുണകരമാകും? 

തിരുവനന്തപുരത്തുനിന്നു മൂകാംബികയിലേക്കു പോകുന്ന ടൂറിസ്റ്റ് ബസിൽ കയറാൻ എനിക്ക് കാക്കനാട്ട് നിന്ന് കലൂർ ബസ് സ്റ്റാൻഡിൽ ഇറങ്ങി അവിടെ നിന്നും ടൂർ പാർട്ടിയ്‌ക്കൊപ്പം ചേരാം. പഴയ ചട്ടമനുസരിച്ച് അത് നടക്കില്ല. 

യാത്രക്കാരുടെ ലിസ്റ്റിന്റെ മൂന്നു കോപ്പി എന്നത് ഒരു ഇലക്ട്രോണിക് കോപ്പി മാറ്റി എന്നാക്കി.  

പുതിയ ചട്ടങ്ങളിൽ ഒഴിവാക്കിയ 82 മുതൽ 85A വരെയുള്ളവ വായിച്ചുനോക്കിയാൽ ആർക്കും മനസിലാകും സർക്കാർ എത്ര ധാരണയോടുകൂടിയാണ് അത് ചെയ്തതെന്ന്. (ലിങ്ക് കമന്റിൽ കൊടുത്തിട്ടുണ്ട്)  

ഒഴിവാക്കിയ ചട്ടങ്ങളിൽ ടൂറിസ്റ്റ് വാഹനം സ്റ്റെയ്ജ് കാരിയർ ആയി ഉപയോഗിക്കരുത് എന്ന ചട്ടവുമുണ്ട്. 

അതിനർത്ഥം ടൂറിസ്റ്റ് വാഹനം സ്റ്റെയ്ജ് കാരിയർ ആയി ഓടിക്കാം എന്നാണെന്നാണ് റോബിൻ ബസ് ആവേശക്കമ്മിറ്റ്കാർ വാദിക്കുന്നത്.   

എന്തൊരു വിതണ്ഡവാദമാണിത്! സ്റ്റെയ്ജ് കാര്യരായി ഉപയോഗിക്കേണ്ട വാഹനങ്ങളുടെ കാര്യത്തിൽ കാണ്ഡം കാണ്ഡമായി നിയമത്തിലും ചട്ടങ്ങളിലും വിശദമായി പറയുന്നുണ്ട്. ടൂറിസ്റ്റ് ഓപറേറ്ററുടെ ടൂരിസ്റ്റ് വാഹനത്തിനു മാത്രമാണ് ടൂറിസ്റ്റ് പെർമിറ്റ്  അനുവദിക്കുന്നത് എന്ന് പുതിയ ചട്ടത്തിൽ കൃത്യമായി പറയുന്നുണ്ട്. 

അതൊന്നും നമ്മുടെ ഉല്സാഹക്കമ്മിറ്റി സമ്മതിക്കില്ല. 

ടൂറിസ്റ്റ് വാഹനങ്ങൾക്കു കൊടുത്ത ആനുകൂല്യങ്ങളിൽ ചിലതു സ്റ്റെയ്ജ് കാരിയറുകളുടേതാണ് എന്നതുകൊണ്ട് അവ സ്റ്റെയ്ജ് കരിയറുകളാക്കി ഓടിക്കാം എന്നൊക്കെയാണ് അവരുടെ വാദം. 

കലൂര് നിന്ന് ആലുവയ്ക്കു പോകുന്ന വണ്ടിയുടെ അതേ ചട്ടങ്ങളാണ് കലൂര് നിന്ന് ആഗ്രയ്ക്കു പോകുന്ന വണ്ടിയ്ക്കും എന്ന്!  

തത്കാലം ആ വാദം അംഗീകരിക്കാൻ പറ്റില്ലെന്നാണ് കോടതി പറഞ്ഞിരിക്കുന്നത്.  

ടൂറിസം വ്യവസായത്തെ പ്രോത്സാഹിപ്പിക്കാൻ കേന്ദ്ര സർക്കാർ കൊണ്ടുവന്ന ചട്ടങ്ങൾ ദുരുപയോഗപ്പെടുത്തിയും നിയമത്തെ ദുർവ്യാഖ്യാനം നടത്തിയും  അത് നടപ്പാക്കാൻ നടക്കുന്ന ഉദ്യോഗസ്‌ഥന്മാരെയും സർക്കാരിനെയും വെല്ലുവിളിച്ചും ഇക്കാര്യങ്ങൾ നടത്തിക്കൊണ്ടുപോകാം എന്ന് ആരാണ് ഈ മനുഷ്യർക്ക് ഉപദേശം നൽകുന്നത്!

നിയമലംഘകർക്ക് വേണ്ടി കൊട്ടേഷൻ എടുത്തു നടക്കുന്ന ചില മാധ്യമപ്രവർത്തകരുണ്ട്. 

എന്ത് പറയാനാണ്!  

***

ഇത്രയുമൊക്കെ  പറഞ്ഞിട്ടും മനസിലാകാത്തവർക്കുവേണ്ടി ഏകദേശം ഒരുദാഹരണം പറഞ്ഞുനിർത്താം.

നിങ്ങളുടെ ഒരു അടുത്ത ബന്ധു പഠനാർത്ഥം നിങ്ങളുടെ വീട്ടിൽ താമസിക്കുന്നു എന്നിരിക്കട്ടെ. 

ഉദാരമതികളായ നിങ്ങളുടെ മാതാപിതാക്കൾ ആ ബന്ധുവിനെ നിങ്ങളെപ്പോലെ കരുതുന്നു. വീട്ടിൽ ഒരു പോലെ കണ്ടു പെരുമാറുന്നു; വീട്ടിലെ എല്ലാ സൗകര്യങ്ങളും ഉപയോഗിക്കാൻ ബന്ധുവിന് അനുവാദം കൊടുക്കുന്നു. എന്തിന്, നിങ്ങളെപ്പോലെ സ്‌കൂളിൽ നിന്നും  വരുമ്പോൾ അടുത്ത ബേക്കറിയിൽനിന്നു ഇഷ്ടമുള്ളത് കൊടുത്തേക്കാൻ ബേക്കറിക്കാരനെ ചുമതലപ്പെടുത്തുക കൂടി ചെയ്യുന്നു.

അതിനർത്ഥം നിങ്ങളുടെ മാതാപിതാക്കളുടെ സ്വത്തിനു ബന്ധുവിന് അർഹതയുണ്ട് എന്നല്ല. അങ്ങിനെയൊരു അവകാശവാദം ഉന്നയിച്ചാൽ ആരും വകവയ്ക്കില്ല. കാരണം രണ്ടുപേരും രണ്ടു വിഭാഗങ്ങളിൽപെട്ട മനുഷ്യരാണ്; ചില ആനുകൂല്യങ്ങൾ ഒരേപോലെ അനുഭവിക്കുന്നു എന്നതുകൊണ്ട്  ഒരേ കാറ്റഗറി ആകുന്നില്ല. രണ്ടിന്റെയ്യും നിർവ്വചനങ്ങൾ വേറെ വേറെ അവിടെ കിടക്കുന്നുണ്ട്.  

അതാണ് ഇപ്പോൾ ഹൈക്കോടതി ഒരു ഇടക്കാല ഉത്തരവിൽ വ്യക്തമാക്കിയത്.   

ആവേശക്കമ്മിറ്റിക്കാർ പിരിഞ്ഞുപോയാൽ അവർക്കു നല്ലത്; അല്ലെങ്കിൽ കെ എൻ ബാലഗോപാലിനു നല്ലത്.

ശബരിമല തീർത്ഥാടനം സംഘർഷഭരിതമാക്കാൻ സംഘികൾ എറിയുന്ന ചൂണ്ടയിലെ പുഴുവാണ് ഗിരീഷ് ബേബി എന്ന റോബിൻ ഗിരീഷ്

കാര്യങ്ങൾ മനസ്സിലായല്ലോ...  ഒരു പ്രശ്നങ്ങളുമില്ലാതെ നടക്കുന്ന മണ്ഡല - മകര വിളക്ക്  ശബരിമല തീർത്ഥാടനം സംഘർഷഭരിതമാക്കാൻ സംഘികൾ എറിയുന്ന ചൂണ്ടയിലെ പുഴുവാണ് ഗിരീഷ് ബേബി എന്ന റോബിൻ ഗിരീഷ് ... രണ്ട് പ്രാവശ്യം മാധ്യമങ്ങൾക്ക് നൽകിയ ബൈറ്റിൽ ഇയാൾ ശബരിമല വിഷയം തിരുകി കയറ്റി.

1 കോയമ്പത്തുരിൽ തമിഴ്നാട് MVD റോബിൻ ബസ് പിടിച്ചിട്ടപ്പോൾ . ബസ് പിടിച്ചിട്ടില്ലെങ്കിൽ ശബരിമല തീർത്ഥാടകരുമായി വരുന്ന തമിഴ് നാട് ബസുകൾ കേരള MVD പിടിച്ചിടുമെന്ന് കേരള സർക്കാർ ഭീഷണിപ്പെടുത്തി എന്ന കള്ളം പറഞ്ഞു '

2 തമിഴ്നാട് MVD ഫൈൻ ഈടാക്കി ബസ് വിട്ടു കൊടുത്തപ്പോൾ ആൾ ഇന്ത്യ ടൂറിസ്റ്റ് പെർമിറ്റ് ഉപയോഗിച്ച് ശബരിമലയിലേക്ക് സർവീസ് നടത്തുമെന്ന് പറഞ്ഞു  ( നിലയ്ക്കൽ നിന്ന് പമ്പയിലേക്കും ) ശബരിമല ഭക്തരെ പിഴിഞ്ഞ് സർക്കാർ കാശ് ഉണ്ടാക്കുന്നു എന്നുള്ള കള്ളം പറഞ്ഞു. 

വസ്തുത :-  ഗുഡ്സ് വെഹിക്കിൾസ് ( ലോറി, മിനി ലോറി , ഗുഡ്സ് ഓട്ടോ ) ഒഴികെ ഏത് തരം അന്തർസംസ്ഥാന ടൂറിസ്റ്റ് / മറ്റ് ബസുകൾക്ക് നിലയ്ക്കൽ വരെ സർവീസ് നടത്താം... മറ്റ് സംസ്ഥാന RTCകൾക്ക് പമ്പ വരെ സർവീസ് നടത്താം. പമ്പയിൽ ആളെ ഇറക്കി തിരിച്ച്  നിലയ്ക്കൽ വന്ന് പാർക്ക് ചെയ്യണം. 14 സീറ്റോ അതിൽ താഴെയുള്ള വാഹനങ്ങൾക്ക് മാത്രമേ പമ്പയിൽ പാർക്കിങ്ങ് അനുമതി ഉള്ളൂ... KSRTC യ്ക്ക് മാത്രമേ പമ്പയിൽ സ്റ്റാന്റ് ഉള്ളൂ... പമ്പാ തീരം വനം വകുപ്പിന്റെ അധീനതയിൽ ആയതു കൊണ്ട് പമ്പയിൽ കൂടുതൽ പാർക്കിങ്ങിന് ഉള്ള സ്ഥലം വനം വകുപ്പ് വിട്ടു നൽകില്ല. 

വലിയ സ്വകാര്യ / ടൂറിസ്റ്റ്  വാഹനങ്ങൾ നിലയ്ക്കൽ വരെ സർവീസ് പാടുള്ളൂ എന്ന സർക്കാർ തീരുമാനം ഹൈക്കോടതിയും ശരിവെച്ചിട്ടുള്ളതാണ്.. വസ്തുത ഇതായിരിക്കേ നിലയ്ക്കൽ - പമ്പ റൂട്ടിലേയ്ക്കും സർവീസ് നടത്തുമെന്നുള്ള റോബിൻ ഗിരീഷിന്റെ പരസ്യ പ്രസ്താവന സംസ്ഥാനത്തോടുള്ള യുദ്ധ പ്രഖ്യാപനമാണ്...  അത് അനുവദിച്ച് നൽകാനാകില്ല... ഇയാളെ മുൻനിർത്തി ശബരിമലയിൽ ഒരു സംഘർഷം സൃഷ്ടിക്കുന്നതിനുള്ള ആസൂത്രിത നീക്കം സംഘികൾ തുടങ്ങിക്കഴിഞ്ഞു...

റോബിൻ ബസിന് ഓരോ ട്രിപ്പിലും MVD ഫൈൻ അടിച്ച് കൊടുക്കൽ തുടർന്ന് കൊണ്ടേയിരിക്കുന്നു.  പെർമിറ്റ് വ്യവസ്ഥയുടെ ലംഘനം അയാൾ തുടരുന്നു എന്നത് തന്നെ കാരണം. സ്റ്റേജ് ക്യാരേജ് ആയി സർവീസ് നടത്താമെന്ന് 

ഗിരീഷ് പറയുന്ന കള്ളം പൊളിക്കുന്ന വസ്തുതകർ വ്യക്തമാക്കാം...

1.  ഭരണഘടനയുടെ ഏഴാം പട്ടികയിലെ  മൂന്നാം ലിസ്റ്റിൽ ( കൺകറന്റ് ലിസ്റ്റ് ) ഇനം 35 ലാണ് മോട്ടോർ വാഹനവും അതിന്റെ നികുതിയും കിടക്കുന്നത്. ( 35. Mechanically propelled vehicles including the principles on which

taxes on such vehicles are to be levied) കേന്ദ്ര  മോട്ടോർ വെഹിക്കിൾ നിയമം പാർലമെന്റ് പാസാക്കിയത് ഈ അധികാരം ഉപയോഗിച്ചാണ് . സംസ്ഥാനങ്ങൾക്ക് കേന്ദ്ര നിയമ വ്യവസ്ഥകൾക്കു വിരുദ്ധമല്ലാത്ത നിയമം ഉണ്ടാക്കാം. ഈ നിയമത്തിൽ തന്നെ വിരുദ്ധമല്ലാത്ത ഭേദഗതികൾ വരുത്താം . ആക്ട് പരിശോധിച്ചാൽ ഇങനെ സംസ്ഥാനം വരുത്തിയ ഭേദഗതികൾ കാണാo .

2. നിയമത്തിലെ (Act) വ്യവസ്ഥകൾക്കു വിരുദ്ധമല്ലാതെ ചട്ടങ്ങൾ നിർമ്മിക്കാൻ കേന്ദ്ര സർക്കാരിനും സംസ്ഥാനങ്ങൾക്കും അധികാരമുണ്ട് . ആക്ടിലെ വ്യവസ്ഥകൾക്കു വിരുദ്ധമായ വ്യവസ്ഥകൾ ചട്ടത്തിൽ കൊണ്ടു വന്നാൽ നിയമ വിരുദ്ധമാണ് ( Ultravires of the Act) , അതു  നിലനിൽക്കില്ല.

3. കേന്ദ്ര മോട്ടോർ വാഹന നിയമത്തിന്റെ (Act) വകുപ്പ് രണ്ട് definition Clause ആണ് . Contract Carriage , stage carriage , Goods Carriage തുടങ്ങിയവയെല്ലാം വിവിധ ക്ലോസുകളിലായി ഇവിടെ define ചെയ്യുന്നുണ്ട്.  ഇതിൽ clause 43 ആണ് " tourist vehicle " എന്താണ് എന്നു പറയുന്നത്. 

" tourist vehicle means a contract carriage........"    ഇതാണ് നിർവ്വചനം.

4. ഇപ്പോൾ വിവാദമായിട്ടുള്ള റോബിൻ ബസ് All India Tourist permit എടുത്തിട്ടുള്ളതിനാൽ എങ്ങനെയും ( അതായത് stage carriage ആയിട്ടും ) ഓടാം എന്നതാണല്ലോ അവരുടെ വാദത്തിന്റെ ചുരുക്കം. All India Touris vehicles ( Permit ) Rules 2023 കേന്ദ്ര സർക്കാർ  കേന്ദ്ര മോട്ടോർ വാഹന നിയമത്തിന്റെ വകുപ്പ് 88 ലെ ഉപവകുപ്പ് 14 നൽകുന്ന ചട്ട നിർമ്മാണ അധികാരം ഉപയോഗിച്ച് ഇറക്കിയ Rules ആണ് . ഇതേ വകുപ്പിലെ ഉപ വകുപ്പ് 9 ൽ പറയുന്ന ടൂറിസം പ്രമോഷനു വേണ്ടി all India Tourist permit കൊടുക്കാമെന്ന വ്യവസ്ഥയുടെ നടത്തിപ്പിനാണ് ഈ ചട്ടം ഉണ്ടാക്കിയിട്ടുള്ളത്. രണ്ടു കാര്യങ്ങൾ ഇവിടെ പ്രസക്തമാണ്. ഒന്ന്, ഈ ചട്ടം  കേന്ദ്ര മോട്ടോർ  വാഹന നിയമത്തിലെ വ്യവസ്ഥകൾക്കു വിധേയമാണ്. രണ്ട് , എന്താണീ ചട്ടത്തിന്റെ ഉദ്ദേശം എന്നത് Section 88 (9) പ്രകാരം , തടസമില്ലാത്ത അന്തർസംസ്ഥാന ടൂറിസം പ്രമോഷനാണ് എന്നതും സുവ്യക്തമാണ്.

5..All India Tourist vehicles ( Permit ) Rules 2023  അതിന്റെ definition Clause ലും scope സംബന്ധിച്ച വ്യവസ്ഥയിലും ഈ ചട്ടത്തിന്റെ ഉദ്ദേശം വ്യക്തമാക്കിയിട്ടുണ്ട്. Rule 2 (b) All India Tourist permit means a permit issued by the Transport Authority to enable a tourist vehicle operator / owner to Ply tourist vehicle through out the territory of India ...." അപ്പോൾ ഈ പെർമിറ്റ് Tourist vehicle ഓടിക്കാൻ ഉദ്ദേശിച്ചുള്ളതാണ്. ഈTourist vehicle എന്നാൽ എന്താണ് എന്നും ഇതേ ചട്ടത്തിലെ 2 (d) വ്യക്തമാക്കുന്നുണ്ട്. 2 (d) " tourist vehicle shall have the same meaning assigned to them in clause 43 of Section 2 of the Act " കേന്ദ്ര മോട്ടോർ വാഹന നിയമത്തിലെ അതേ നിർവ്വചനമാണ് ബാധകം എന്നാണ് അർത്ഥം. അതു നേരത്തേ കണ്ടു.tourist vehicle means a contract carriage........" ഇതാണല്ലോ അവിടെ പറയുന്നത്. അതായത് ഈ permit contract Carriage നു കൊടുക്കുന്ന ഒന്നു മാത്രമാണ്.

6. All India Tourist vehicles ( Permit ) Rules 2023 ന്റെ Rule 6 ഈ ചട്ടങ്ങൾ പ്രകാരമുള്ള പെർമിറ്റിന്റെ  Scope പറയുന്നുണ്ട്. 6 (2) ഇതാണ്. "The All India Tourist permit shall be used for the transport of tourists ........''  ഇതു ടൂറിസ്റ്റ് യാത്രയ്ക്കുള്ള  contract Carriage Permit ആണ് വിഭാവനം ചെയ്തിരിക്കുന്നത് എന്നു വ്യക്തം.

7. സകല ഫാൻസ് അസോസിയേഷൻകാരും പറയുന്ന വാദം ഈ ചട്ടങ്ങളിലെ Rule 13 പ്രകാരമുള്ള ഒരു  exemption സംബന്ധിച്ചാണ് . കേന്ദ്ര മോട്ടോർ വാഹന ചട്ടങ്ങൾ 1989 ലെ Rule 82 മുതൽ 85 A വരെയുള്ള വ്യവസ്ഥകൾ All India Tourist permit നു ബാധകമാകില്ല എന്നതാണ് ഈ exemption. ഇവിടെ രണ്ടു കാര്യങ്ങൾ പ്രസക്തമാണ്. കേന്ദ്ര മോട്ടോർ വാഹന Act ലെ വ്യവസ്ഥകൾ ഒരു ചട്ടംകൊണ്ടും മറികടക്കാനാവില്ല. ഇവിടെ ഒഴിവു കൊടുത്തിരിക്കുന്നത്  1989 ലെ കേന്ദ്ര മോട്ടോർ വാഹന ചട്ടങ്ങളിലെ ചില വ്യവസ്ഥകളിൽ നിന്നുമാണ്. Act ലെ വ്യവസ്ഥകൾക്കുo സ്വഭാവത്തിനും വിരുദ്ധമായ ഒരു ചട്ടവും Ultimate Judicial Review ൽ നിലനിൽക്കില്ല. 

8. ഈ exemptions ന്റെ കാര്യo കൂടി പറയേണ്ടതുണ്ട്. കേന്ദ്ര മോട്ടോർ വാഹന ചട്ടങ്ങളിലെ അദ്ധ്യായം 4 ടൂറിസ്റ്റ് പെർമിറ്റ് സംബന്ധിച്ചുള്ള വ്യവസ്ഥകളാണ് ഉൾക്കൊള്ളുന്നത്. ടൂറിസ്റ്റ് പെർമിറ്റ് നടപടിക്രമങൾ, ഉപാധികൾ, ഫീസ് എന്നിവയൊക്കെയാണ് ഇതിൽ വ്യവസ്ഥപ്പെടുത്തിയിട്ടുള്ളത്. പുതിയ പ്രത്യേകമായ ടൂറിസ്റ്റ് പെർമിറ്റ്  ചട്ടങ്ങളുടെ പശ്ചാത്തലത്തിൽ ഇത് മനസിലാക്കണം. തടസ രഹിതമായ അന്തർ സംസ്ഥാന ടൂറിസമാണ് ചട്ടങ്ങളുടെ ലക്ഷ്യം. ടൂറിസം ഓപ്പറേഷനുള്ള  വ്യവസ്ഥകൾ  ലിബറലാക്കുക എന്നതാണ് ഇംഗിതം . ടൂറിസ്റ്റുകളുടെ ലിസ്റ്റ്, ബസിന്റെ നിറം ഇങ്ങനെയുള്ള പലതും exempt ചെയ്യുകയാണ് ചെയ്തിരിക്കുന്നത്. എന്നാൽ ഈ exempted വ്യവസ്ഥയിൽ " The permit holder shall not operate the tourist vehicle as a stage Carriage " എന്ന വ്യസ്ഥ കൂടി പെട്ടിരിക്കുന്നു. ഇതാണ് റോബിൻ ഫാൻസ് ഉന്നയിക്കുന്ന പ്രസക്തമായ വാദം. ഈ വ്യവസ്ഥയിൽ നിന്നും exemption വരുന്നതോടെ tourist vehicle നു stage carriage ആക്കി ഓടിക്കാം എന്നതാണ്  ഈ സാങ്കേതിക വാദം. എന്നാൽ റൂട്ട്, ഫെയർ , ഷെഡ്യൂൾ , കൺസഷൻ തുടങ്ങി Stage Carriage നു ബാധകമായ റഗുലേറ്ററി വ്യവസ്ഥകൾ ഒന്നും തങ്ങൾക്കു ബാധകവുമാകില്ല എന്നതാണ് ഈ ഫാൻസ് ക്ലബ്ബ് അവകാശ വാദം.

9. Stage carriage , contract Carriage എന്നിവയും tourist vehicle എന്നതും എല്ലാം എന്താണ് എന്നത് മാതൃ നിയമത്തിലാണ് വ്യവസ്ഥ ചെയ്തിരിക്കുന്നത്. അതു നിയമ ഭേദഗതി വഴിയല്ലാതെ ചട്ടങ്ങൾ രൂപീകരിച്ച് മറികടക്കാനാകില്ല. Stage carriage ആയി പ്രവർത്തിക്കുവാൻ വേണ്ട വ്യവസ്ഥകളിൽ ഈ ചട്ടം പോലും ഇളവു നൽകുന്നില്ല. നൽകിയാലും നിലനിൽക്കില്ല. All India Tourist vehicles ( Permit ) Rules 2023 ന്റെ scope അതേ ചട്ടങ്ങളിൽ വ്യക്തമാണ്. The All India Tourist permit shall be used for the transport of tourists ........'' ഈ scope നു അനുരോധമായ exemptions അല്ലാതെ അതിനെ മറികടക്കുന്ന   exemptions, അതും മാതൃ നിയമത്തിനു വിരുദ്ധമായവ ,  അതിരു കടന്നതും സദുദ്ദേശ പരമല്ലാത്തതുമാണ് . അതു judicial Review ൽ നിലനിൽക്കാനേ പോകുന്നില്ല.

10. അവസാനമായി കേരള ഹൈക്കോടതിയുടെ ഇടക്കാല ഉത്തരവ്.

"  shall be allowed to operate his vehicle in respect of the bookings already done subject to payment of fine......" ഇതല്ലേ ഉത്തരവ് ?

ബുക്കിങ് നിറവേറാം . ബുക്കിങ് എന്നത് കോൺട്രാക്ടാണ്. കോൺട്രാക്ട് കോൺട്രാക്ട് കാരിജിനു ബാധകമായതല്ലേ ?

 അപ്പോൾ ഇതു കൊണ്ടു മാത്രം എല്ലാ റൂട്ടിലും  ബസ് ഓടിച്ച് ഞങ്ങൾ KSRTC യെയും പൊതു ഗതാഗതത്തിനു മേലുള്ള സാമൂഹ്യ നിയന്ത്രണവും  തകർക്കും എന്നൊക്കെയുള്ള വീരസ്യം തൽക്കാലം നടക്കില്ല.